EGAPE IKASTOLA KEMENTSU 2021-2022KO ERRONKEN AURREAN
2021-2022 ikasturtea hastearekin batera erronka berriei aurre egiteko gogotsu gatoz HH-LH eta DBHko zuzendaritzak.
Ezkerretik eskuinera: Miriam Larrinaga (DBHko idazkaria), Nekane Legarreta (DBHko ikasketa burua), Amaia Amutxastegi (DBHko zuzendaria), Edurne Arzelus (HH-LHko idazkaria), Aitziber Zipitria (HH-LHko zuzendaria) eta Ainhoa Matilla (HH-LHko ikasketa burua).
Hasiera eman diogun 2021-2022 ikasturte honetan zuzendaritza berria dugu Haur eta Lehen Hezkuntzako etapetan. Juan Luis Alkorta eta Koro Berasategik utzitako lekukoa Aitziber Zipitria eta Ainhoa Matillak hartu dute, zuzendaria eta ikasketa burua hurrenez hurren, Edurne Arcelus idazkariarekin batera. Egape ikastolako proiektua indartzen jarraitzeko gogoz eta ilusioz dauzkagu eta Bigarren Hezkuntzako zuzendaritza taldearekin elkar lanean ikasturte berri honetako erronkei aurre egiteko irrikitan gaude.
Euskara gure egunerokoan ezinbesteko tresna izanik, euskararen erabilera sustatu eta indartzea eskuartean dugun erronka garrantzitsua da. Elkarlanean Egape ikastola euskararen arnasgune izatea da xede: Euskaraz bizi eta euskaraz gozatzea uneoro eta edonon! Horretarako, Hizkuntza proiektuetan jasota ditugun hizkuntzen tratamendu integrala, irakurzaletasuna eta ahozkotasuna lantzeaz gain, komunitate osoaren eta gizartearen inplikazioa bultzatu beharko dugu eskolak berak bakarrik ez baitu helburu hori lortuko.
Metodologia aktiboetan buru-belarri murgilduta gabiltza azken urteetan. Haur Hezkuntzak hasitako bideari Lehen Hezkuntzako lehenengo mailetan emango diogu segida, KIMU material berriarekin. Bestalde, EKI proiektua sendotzen jarraituko dugu, aurten lehen aldiz LH 4.mailan. ldo beretik, Bigarren Hezkuntzan proiektu bidezko metodologia honetan arloartekotasuna eta ikasketa zerbitzua landuko ditugu. Gainera, Ikaskuntza Kooperatiboa metodologiarekin jarraituko dugu Lehen Hezkuntzan hasitako ibilbidea Bigarren Hezkuntzan osatuz.
Balioei dagokienez eta eskola inklusiboa abiapuntu hartuta, aniztasunean, hezkidetzan eta berdintasunean hezten jarraituko dugu guztiontzat den kalitatezko ikastola publikoaren alde. Bestalde, gure ikasleen konpetentzia digitala hobetzen jarraituko dugu egungo beharrei ahalik eta era egokienean erantzuteko, hasierako etapetatik Bigarren Hezkuntza bitarte.
Azkenik, eta urte luzeetan bezalaxe, DBHko eraikin berriaren aldarrikapenarekin jarraitu beharko dugu lehenbailehen Urnietako herriak ikastola publiko duin bat izan dezan.
EKIN DIEZAEGUN DENOK ELKARREKIN AURTENGO ERRONKEI!!!
